அமெரிக்காவின் ஃபுளோரிடா கடற்படைத் தளத்தில் நடத்தப்பட்ட துப்பாக்கிச் சூடு பயங்கரவாதத் தாக்குதலாக இருக்கலாமென அமெரிக்க மத்தியக் குற்றப்புலனாய்வுத் துறை தெரிவித்துள்ளது. ஃபுளோரிடா கடற்படைத்தளத்தில் கடந்த வெள்ளிக்கிழமை முகமது அல்ஷம்ரானி என்ற சவுதி அரேபிய மாணவர் கைத்துப்பாக்கியால் நடத்திய தாக்குதலில் மூவர் உயிரிழந்ததுடன் எட்டுப் பேர் காயமடைந்தனர். அவரை அமெரிக்க இராணுவத்தினர் சுட்டுக் கொன்றனர். இந்நிலையில், முகமது சயித் தனிப்பட்ட முறையில் அந்தத் தாக்குதலை நடத்தினாரா அல்லது வேறு ஏதேனும் குழுவுடன் அவருக்குத் தொடர்பு இருக்கிறதா என்பதை அறிய முயல்வதாக மத்தியப் புலனாய்வுத் துறை அதிகாரி கூறியுள்ளார். சவுதி அரேபியப் பயிற்சி மாணவர்கள் சிலரிடம் துப்பாக்கிச் சூடு தொடர்பாக விசாரணை நடத்தப்பட்டது. எனினும் எவரும் கைது செய்யப்படவில்லை என்றும் அவர் குறிப்பிட்டார். சவுதி அரேபியப் பயிற்சி மாணவர்கள் தளத்தை விட்டு வெளியே செல்லக்கூடாது என்று கட்டுப்பாடு விதிக்கப்பட்டுள்ளதாகவும் அவர்கள் விசாரணைக்கு ஒத்துழைத்து வருவதாகவும் மத்தியப் புலனாய்வுத் துறை அதிகாரி மேலும் கூறியுள்ளார்.