திருகோணமலை - தம்பலகாமம் பொலிஸ் பிரிவுக்குட்பட்ட முள்ளிப்பொத்தானை ஈச்சநகர் பகுதியில் உள்ள காட்டுப் பகுதியில் இறந்த நிலையில் சிசுவின் சடலமொன்று மீட்கப்பட்டுள்ளதாக தம்பலகாமம் பொலிஸார் தெரிவித்துள்ளனர். சடலம் நேற்று மாலை மீட்கப்பட்டுள்ளதாகவும் பொலிஸார் தெரிவிக்கின்றனர். இச்சம்பவம் குறித்து மேலும் தெரியவருவதாவது, இச்சம்பவத்தில் உயிரிழந்த சிசுவின் பெற்றோர் என அறியப்பட்ட 20 வயதுடைய கணவன் மற்றும் 17 வயதினையுடைய மனைவி ஆகியோரை சந்தேகத்தின் பேரில் கைது செய்துள்ளதோடு மனைவி கந்தளாய் வைத்தியசாலையில் அனுமதிக்கப்பட்டுள்ளதாகவும் பொலிஸார் தெரிவித்துள்ளனர். மேலும் குறித்த தம்பதிகள் வீட்டில் வைத்து சிசுவினை பிரசவித்த நிலையில் வீட்டின் பின்புறம் உள்ள காட்டுப் பகுதியில் பையொன்றினுள் கட்டப்பட்ட நிலையில் சிசுவை வீசி சென்றுள்ளதாக ஆரம்ப கட்ட விசாரணையின் போது தெரியவந்துள்ளது. குறித்த சிசுவின் தாய் இரத்தப்போக்கு காரணமாக வைத்தியசாலையில் அனுமதிக்கப்பட்ட நிலையில் இது தொடர்பில் சந்தேகம் இருப்பதாக தெரிவித்து வைத்தியசாலை நிர்வாகத்தினர் தம்பலகாமம் பொலிஸாருக்கு தகவல் வழங்கினர். இதன்போது பொலிஸாரினால் மேற்கொள்ளப்பட்ட விசாரணையின் பின்னர் காட்டுப் பகுதியிலிருந்து சிசுவின் சடலம் மீட்கப்பட்டுள்ளது. சிசுவின் சடலம் சட்ட நடவடிக்கைக்காக கந்தளாய் நீதிமன்ற நீதவான் தலைமையில் சட்ட வைத்திய அதிகாரியின் நடவடிக்கைக்கு உட்படுத்தப்பட்டுள்ளது. சம்பவம் தொடர்பில் கந்தளாய் தடயவியல் பொலிஸார் மற்றும் தம்பலகாமம் பொலிஸார் மேலதிக விசாரணைகளை மேற்கொண்டு வருகின்றமை குறிப்பிடத்தக்கது