நாட்டில் நிலவும் பொருளாதார மந்த நிலை பல்வேறு பாதிப்புகளை ஏற்படுத்தி உள்ளதுடன் இதன் ஒரு பகுதியாக நாட்டின் ஏற்றுமதி மற்றும் இறக்குமதியும் வீழ்ச்சி அடைந்துள்ளது. இதன்படி, இந்தியாவின் ஏற்றுமதி கடந்த டிசம்பரில் 27.4 பில்லியன் அமெரிக்க டொலராக இருந்த நிலையில், முன்னைய மாதத்தை விட 1.8 சதவீதம் வீழ்ச்சியடைந்துள்ளது. அதேபோல், இறக்குமதியும் கடந்த டிசம்பர் மாதம் 38.6 பில்லியன் அமெரிக்க டொலராக இருந்த நிலையில் அதற்கு முன்னைய மாதத்தை விட 8.8 சதவீதம் வீழ்ச்சியடைந்துள்ளதாக தரவுகளில் தெரியவந்துள்ளது. இதன்காரணமாக வர்த்தகத்தில் 11.3 பில்லியன் டொலர் பற்றாக்குறை ஏற்பட்டுள்ளது. அமெரிக்கா – சீனா இடையே நடந்துவரும் வர்த்தகப் போர் மற்றும் உலக அளவில் பல்வேறு துறைகளில் ஏற்பட்டுள்ள மந்தம் போன்றவை இந்த மாற்றத்திற்கு முக்கிய காரணம் எனவும் கூறப்பட்டுள்ளது. குறிப்பாக இந்தியாவில் இருந்து ஏற்றுமதி செய்யப்படும் பிளாஸ்டிக் பொருட்கள், வைரம், நகை ஏற்றுமதி, தோல் பொருட்கள், இரசாயனப் பொருட்கள் ஆகியவற்றில் வீழ்ச்சி ஏற்பட்டுள்ளது. நாட்டில் உள்ள 30 துறைகளில் 18 துறைகளில் ஏற்றுமதி வாய்ப்பு குறைந்துள்ளது. அடுத்த மாதம் முதலாம் திகதி மத்திய பட்ஜெட் தாக்கல் செய்யப்படுகிறது. ஏற்றுமதியை அதிகரிக்கும் வகையில் அதில் ஏதேனும் சலுகைகள், மாற்றங்கள் செய்யப்பட்டால் தான் மறுபடியும் ஏற்றுமதி அதிகரிக்கும் என வர்த்தக நிபுணர்கள் கூறியுள்ளார்கள். குறிப்பாக இரும்பு, நிலக்கரி, இரசாயனம், உலோகப் பொருட்கள் போன்றவற்றின் வர்த்தகத்தில் கடுமையான பாதிப்பு இருக்கிறது எனவும் அதனை சரிசெய்யும் வகையில் பட்ஜெட்டில் சலுகைகள் இருக்க வேண்டும் என்று கூறியுள்ளார்கள்.