ஆப்கானிஸ்தானில் காஸ்னி மாகாணத்தில் பயணிகள் விமானம் ஒன்று விழுந்து விபத்துக்குள்ளாகியுள்ளது. அந்த பயணிகள் விமானத்தில் 83 பேர் பயணம் செய்துள்ளதாக சர்வதேச செய்திகள் தெரிவிக்கின்றன. ஆப்கானிஸ்தானில் தலிபானின் கட்டுப்பாட்டில் உள்ள காஸ்னி மாகாணம், தே யாக் மாவட்டத்தில் குறித்த விமானம் உள்ளூர் நேரப்படி இன்று (திங்கட்கிழமை)  பகல் 1.15 மணியளவில் விழுந்து நொறுங்கியதாக முதற்கட்டத் தகவல்கள் தெரிவிக்கின்றன. அனேகமாக விமானத்தில் பயணித்த அனைவரும் உயிரிழந்திருக்கலாம் என அஞ்சப்படும் நிலையில், குறித்த பகுதியில் மீட்புப் பணிகள் இடம்பெற்று வருவதாகத் தெரிவிக்கப்படுகிறது. எனினும் விமானத்தில் பயணித்தவர்கள் குறித்து இதுவரையில் எந்தவித தகவல்களும் வெளியாகவில்லை. அத்தோடு இந்த விபத்துக்கான காரணமும் கண்டறியப்படவில்லை.