குடியுரிமைச் சட்டத்திற்கு எதிராக திரிபுராவில் நடைபெற்று வரும் மக்கள் போராட்டங்களில் பங்கெடுப்பதற்காக திரிபுரா மக்கள் முன்னணியின் அழைப்பின் பேரில் தமிழ்த்தேசியப் பேரியக்கப் பொதுச்செயலாளர் ஐயா கி. வெங்கட்ராமன், உலக சீக்கியர் தளம் பேராசிரியர் ஜக்மோகன் சிங், நாம் தமிழர் கட்சி பொறுப்பாளர் திரு. ஜீவா டானிங் ஆகியோர் சென்றுள்ளனர். கடந்த 22.02.2020 பிற்பகலில் துலசிகோக் பகுதியில் நடைபெற்ற மக்கள் திரள் பொதுக்கூட்டத்தில், ஐயா கி. வெங்கட்ராமன், பேராசிரியர் ஜக்மோகன் சிங், திரு. ஜீவா டானிங் ஆகியோர் சிறப்புரையாற்றினர். இதனையடுத்து, நேற்று (23.02.2020) பிற்பகலில் தெலியமுறா பகுதியில் நடைபெற்ற மாநிலந்தழுவிய பேரணி மற்றும் பொதுக்கூட்டத்தில் இத்தலைவர்கள் கூட்டாகப் பங்கேற்றனர். பேரணியின் முடிவில் நடைபெற்ற பொதுக்கூட்டத்தில் உரையாற்றிய ஐயா கி. வெங்கட்ராமன் அவர்கள், குடியுரிமைச் சட்டத்திற்கு எதிரான போராட்டத்தில் மட்டுமின்றி திரிபுரி மக்களின் தேசிய இனப் போராட்டத்திற்கு தமிழ்த்தேசியப் பேரியக்கமும், தமிழர்களும் துணை நிற்போம் என உறுதியளித்தார். நிறைவில், திரிபுரா மக்கள் முன்னணித் தலைவர் பட்டால் கன்யா சமாத்தியா நிறைவுரையாற்றினார். பேரணி மற்றும் பொதுக்கூட்டத்தில், பெருந்திரளான திரிபுரா மக்கள் ஆண்களும் பெண்களுமாக பங்கேற்றனர். இந்திய அரசின் குடியுரிமைச் சட்டத்திற்கு எதிராக முழக்கங்களை எழுப்பினர். இந்திய அரசே! குடியுரிமைத் திருத்தச் சட்டத்தை முற்றிலுமாகத் திரும்பப் பெறு! - திரிபுரா பொதுக்கூட்டத்தில் தமிழ்த்தேசியப் பேரியக்கப் பொதுச்செயலாளர் ஐயா கி. வெங்கட்ராமன் பேச்சு!