லெபனான் மக்களின் நிம்மதியான வாழ்க்கைக்கு வழிசெய்வதாக, பிரான்ஸ் ஜனாதிபதி இமானுவல் மக்ரோன் உறுதியளித்துள்ளார். லெபனான் பெயிரூட்டில் அமோனியா நைட்ரேட் சேமிப்புக் கிடங்கில் ஏற்பட்ட வெடிப்பு சம்பவத்தை தொடர்ந்து, பெயிரூட்டிற்கு விரைந்த ஜனாதிபதி இமானுவல் மக்ரோன், நேரடியாக மக்களையும் அரசியற் தலைவர்களையும் சந்தித்தார். இதன்போதே இந்த வாக்குறுதியை அளித்தார். மேலும், மக்களிற்கு வழங்கப்படும் நிவாரணப்பொருட்கள் மற்றும் உதவிகள், ஊழல்வாதிகளின் கைகளிற்குச் செல்லாமல் மக்களிற்கு வழங்கப்படுவதற்கான ஏற்பாடுகளைச் செய்வதாகவும், இதனை விசாரணை செய்வதற்காக, மீண்டும் செப்டெம்பர் மாதம் பெயிரூட் வந்து மக்களைச் சந்திப்பதாகவும், எமானுவல் மக்ரோன் பெய்ரூட் மக்களிற்கு உறுதியளித்துள்ளார். இதனைத் தொடர்ந்து, அங்கு நிலவி வரும் மதரீதியான அடக்கு முறைகள் மற்றும், இஸ்ரேலின் ஆக்கிரமிப்புக்கள் அகியவற்றிற்கு முடிவு கட்டும் வகையில் ஒரு சமாதான உடன்படிக்கையை ஏற்படுத்தவுள்ளதாகவும் தெரிவித்தார். முன்னதாக பிரான்ஸின் ஜனாதிபதி இமானுவல் மக்ரோன், மீட்புப் படையணி மற்றும் நிவாரண உதவிகளை உடனடியாக அனுப்பியிருந்தார் என்பது குறிப்பிடத்தக்கது. பேரழிவுகரமான வெடிப்பில், குறைந்தது 137பேர் உயிரிழந்ததுடன் ஐயாயிரம் பேர்வரை காயமடைந்துள்ளனர்.