தென்தமிழீழம், காரைதீவு பிரதேச வைத்தியசாலை நேற்று முதல் காலவரையறை இன்றி பூட்டப்பட்டுள்ளதாக வைத்திய அதிகாரி டாக்டர் ஜீவராணி சிவசுப்பிரமணியம் தெரிவித்துள்ளார். இதனால் நோயாளர்கள் வேறு வைத்தியசாலைகளுக்கு செல்ல வேண்டிய நிலை ஏற்பட்டது. இதனை பொறுப்பு வைத்திய அதிகாரி டாக்டர் ஜீவராணி சிவசுப்பிரமணியம் உறுதிப்படுத்தினார். வைத்தியர்கள் முதல் அனைத்து ஊழியர்களும் வைத்தியசாலைக்கு வந்திருந்த போதும் எந்த நோயாளர்களுக்கும் சிகிச்சையளிக்கப்படவில்லை. இது தொடர்பாக வைத்திய அதிகாரி டாக்டர் ஜீவராணி சிவசுப்பிரமணியத்திடம் கேட்ட போது, முன்னாள் வைத்தியத்துறை பேராசிரியர் டாக்டர் வரகுணம் எமக்கு அன்பளிப்பாக வழங்கிய வைத்தியசாலைக்கு சொந்தமான காணி தற்காலிகமாக மைதானமாக பயன்படுத்தப்பட்டு வருகின்றது. அங்கு எமது சுகாதார திணைக்கள ஊழியர்களுக்கிடையிலான விளையாட்டு நிகழ்வை நடத்த பிராந்திய சுகாதார சேவைப்பணிப்பாளரின் எழுத்து மூல வேண்டுகோளுக்கமைவாக 4 தினங்கள் பயன்படுத்த அனுமதி வழங்கப்பட்டது. ஊழியர்கள் விளையாடிக்கொண்டிருக்கையில் அங்கு வழமையாக விளையாடும் ஊர்ச்சிறுவர்கள் தாமும் இதே மைதானத்தில் விளையாட வேண்டும் என்று வாக்குவாத்தில் ஈடுபட்டுள்ளனர். பின் அவர்களை சமாதானப்படுத்தி அனுப்பி விட்டோம். சில மணிநேரத்துள் மற்றுமொரு கும்பல் வந்து தாறுமாறாக எம்மிடம் கேள்வி எழுப்பி ஆர்ப்பாட்டத்தில் ஈடுபட ஆயத்தமானது. அவர்களுடன் நானும் சக வைத்தியர்களும் நிலமையை எடுத்துக் கூறிய போதும் அவர்கள் கேட்கவில்லை. இதனால் வேறு வழியின்றி வைத்தியசாலையை பூட்டுவதற்கு முடிவெடுத்து உரிய தலைமைகளிடம் அறிவித்துவிட்டு நாம் அன்றிரவு வெளியேறினோம். இதற்கொரு தீர்வு எட்டும் வரை காலவரையறை இன்றி நாம் நோயாளிகளை பார்ப்பதில்லை என தீர்மானித்துள்ளோம் என்றார்