வட  தமிழீழம் யாழ்ப்பாணம் ஐந்து சந்திப் பகுதியில் இயங்கிய கட்டிகை, (கேக் ) விற்பனை நிலையம்  நேற்று செவ்வாய்க்கிழமை  அன்று முன்னெடுக்கப்பட்ட தேடுதலில் இந்திய போதை பொருளான   மாவா மீட்கப்பட்டது.  அதனை விற்பனைக்காக வைத்திருந்தார் என்ற குற்றச்சாட்டில் ஒருவர் கைது செய்யப்பட்டார்.   “யாழ்ப்பாணத்தில் பாடசாலை மாணவர்கள் உள்பட இளைஞர்களுக்கு மாவா போதைப் பொருள் விற்பனை செய்யப்படுவதாக புலனாய்வுப் பிரிவு உத்தியோகத்தர்களுக்கு தொடர்ச்சியாக முறைப்பாடுகள் கிடைத்தன. அவை தொடர்பில் முன்னெடுக்கப்பட்ட விசாரணைகளின் அடிப்படையில் புலனாய்வுப் பிரிவினரால் யாழ்ப்பாணம் ஐந்து சந்திப் பகுதியிலுள்ள கட்டிகை, (கேக் )விற்பனை நிலையத்தில்  முன்னெடுக்கப்பட்ட தேடுதலின் போது, விற்பனைக்குத் தயாராகவிருந்த சுமார் 3 கிலோ கிராம் மாவா போதைப் பொருள் பொதிகள் கைப்பற்றப்பட்டன. அதனை விற்பனைக்கு வைத்திருந்தார் என்ற குற்றச்சாட்டில் கட்டிகை, (கேக்) விற்பனை நிலையத்திலிருந்த ஒருவர் கைது செய்யப்பட்டார். சந்தேகநபர் யாழப்பாணக்காவல்  நிலையத்தில் ஒப்படைக்கப்பட்டுள்ளார். அத்துடன், அவரிடம் மீட்கப்பட்ட மாவா போதைப் பொருளும் காவல்  நிலையத்தில் பாரப்படுத்தப்பட்டுள்ளது. விசாரணைகளின் பின்னர் சந்தேகநபர் நாளை யாழ்ப்பாணம் நீதிவான் நீதிமன்றில் முற்படுத்தப்படுவார்” என்று காவல்துறையினர் மேலும் தெரிவித்தனர்.