தமிழ்த் தேசியக் கூட்டமைப்பின் தலைவர் இரா.சம்பந்தனையும், சில நாடாளுமன்ற உறுப்பினர்களையும் நாளை மறுதினம் சந்திப்பதற்கு அரச தலைவர் மைத்திரிபால சிறிசேன அழைப்பு விடுத்துள்ள நிலையில், அவரைச் சந்திப்பதா இல்லையா என்பது தொடர்பில் கூட்டமைப்பு முடிவு எடுக்கவில்லை என்று தெரியவருகின்றது. நாட்டில் ஏற்பட்டுள்ள அரசியல் குழப்ப நிலைக்கு அரச தலைவர் மைத்திரிபால சிறிசேனவே காரணம் என்று கூட்டமைப்பு குற்றம் சுமத்தி வருகின்றது. உடனடியாக நாடாளுமன்றத்தைக் கூட்டுவதற்கு நடவடிக்கை எடுக்க வேண்டும் என்று கூட்டமைப்பின் தலைவர் சம்பந்தன், அரச தலைவர் மைத்திரிபாலவைச் சந்தித்துக் கோரிக்கையும் முன்வைத்திருந்தார். ஆனால் அரச தலைவர் அதற்குச் செவிசாய்க்கவில்லை. கூட்டமைப்பு நாடாளுமன்ற உறுப்பினர் ஒருவரை, அரச தலைவர் மைத்திரிபால சிறிசேன தமது அணிக்கு இழுத்தெடுத்துள்ளார். இவ்வாறானதொரு நிலையிலேயே, கூட்டமைப்பின் தலைவரையும் சில நாடாளுமன்ற உறுப்பினர்களையும் நாளை மறுதினம் புதன் கிழமை காலை சந்திப்பதற்கு வருமாறு அரச தலைவர் அழைத்துள்ளார்.