ஶ்ரீலங்கா ஜனாதிபதி மைத்திரிபால சிறிசேன நாட்டு மக்களுக்கு விசேட அறிவிப்பொன்றை விடுக்கவுள்ளார். நாடாளுமன்றத்தை கலைத்திருந்த ஜனாதிபதியின் தீர்மானத்திற்கு உயர் நீதிமன்றம் இன்றையதினம் இடைக்கால உத்தரவை பிறப்பித்துள்ளது. இந்நிலையில், நாளைய தினம் நாடாளுமன்றம் உத்தியோகப்பூர்வமாக கூட்டப்படும் என்ற அறிவிப்பும் வெளியாகியுள்ளது. இந்த பரபரப்பான சூழலில் மகிந்த தரப்பினர் உள்ளிட்ட பல்வேறு தரப்புக்கள் அவசர சந்திப்புக்களை மேற்கொண்டு வருகின்றனர். இந்நிலையிலேயே நாட்டு மக்களுக்கு ஜனாதிபதி மைத்திரிபால சிறிசேன விசேட அறிவித்தல் ஒன்றை விடுக்கவுள்ளமை குறிப்பிடத்தக்கது. அடுத்து என்ன அஸ்திரத்தை கையிலெடுக்கலாம் என மிக வேகமாக ஆராயும் மைத்திரி+ மகிந்த தரப்புகள் நாடாளுமன்றத்தை கலைத்து ஜனாதிபதி வெளியிட்டிருந்த வர்த்தமானி அறிவித்தலுக்கு அமைய நடத்தப்படவிருந்த பொதுத் தேர்தலை தற்காலிகமாக ஒத்திவைத்து உயர் நீதிமன்றம் வழங்கிய தீர்ப்பால் பெரும் அசௌகரியத்தை எதிர்நோக்கி வரும் ஜனாதிபதி மைத்திரிபால சிறிசேன தலைமையிலான தரப்பினர் நாடாளுமன்றத்தை மீண்டும் ஒத்திவைக்கும் வர்த்தமானியை வெளியிட முடியுமா என ஆராய்ந்து வருவதாக தகவல்கள் வெளியாகியுள்ளது. இதற்கு அமைய முன்னாள் பிரதம நீதியரசர் சரத் என் சில்வா உள்ளிட்டோர் அரசியலமைப்புச் சட்டத்தை ஆராய்ந்து வருவதாக கூறப்படுகிறது. நாட்டில் அவசர கால நிலைமையை அறிவித்தாவது தீர்ப்பை பின்நோக்கி தள்ளக் கூடிய எந்த வழியாவது இருக்கின்றதா என்பதை தேடிப்பார்க்குமாறு ஜனாதிபதி ஆலோசகர் ஒருவர் சட்டத்தரணிகளுக்கு அறிவுறுத்தியுள்ளதாக தெரியவருகிறது. நாடாளுமன்றத்தை நாளைய தினம் கூட்டுமாறும் அதற்கான அதிகாரம் சபாநாயகருக்கு இருப்பதாகவும் ரணில் விக்ரமசிங்க அறிவித்துள்ளார் என்ற தகவலை அடிப்படையாக கொண்டு இவ்வாறு சட்டத்தரணிகளுக்கு அறிவுறுத்தியுள்ளதாக பேசப்படுகிறது. நாடாளுமன்றம் மீண்டும் கூட்டப்பட்டால், ரணில் விக்ரமசிங்க கட்டாயம் பெரும்பான்மை பலத்தை நிரூபிப்பார் எனவும் அப்படி நடந்தால், பதவியை ராஜினாமா செய்து விட்டு வீட்டுக்கு செல்லப் போவதாக ஜனாதிபதி கூறியுள்ளதாகவும் அந்த ஆலோசகர் சட்டத்தரணிகளிடம் கூறியுள்ளார். இதேவேளை, அத்துடன் ஐக்கிய தேசிய முன்னணி உட்பட ஜனநாயகத்திற்காக குரல் கொடுக்கும் தரப்பினர் உடனடியாக நாடாளுமன்றத்தை நாளைய தினம் கூட்டுமாறு வலியுறுத்தி வருவதாகவும் தெரிவிக்கப்படுகிறது