வடதமிழீழம், மன்னார் பெற்றா பகுதியில் உள்ள தனியார் கல்வி நிலையம் ஒன்றின் வகுப்பரை மீது இனந்தெரியாத நபர்களினால் தீ வைக்கப்பட்டுள்ளது. இந்த சம்பவம் இன்று (சனிக்கிழமை) அதிகாலை இடம்பெற்றுள்ளது. குறித்த கல்வி நிலையத்தின் நிர்வாகத்தினர் இன்று காலை 8 மணியளவில் வகுப்பறையை திறந்தபோது, வகுப்பறை தீப்பற்றி எரிவதை கண்டதையடுத்து, உடனடியாக தீயை கட்டுப்பாட்டிற்குள் கொண்டுவந்துள்ளனர். இதனால் பாரிய சேதங்கள் எதுவும் ஏற்படவில்லை. இனந்தெரியாத நபர்கள் மண்ணென்னை நிறப்பப்பட்ட போத்தல்களில் தீ வைத்து, கல்வி நிலையத்தின் வகுப்பறை மீது வீசியிருக்கலாமென்றும், இதன்போது தீ குறித்த வகுப்பறையின் உள்ளக பகுதிகளில் பரவியிருக்கலாமென சந்தேகிக்கப்படுகின்றது. குறித்த வகுப்பறையிலிருந்து உருகிய நிலையில் இரண்டு பிளாஸ்ரிக் போத்தல்களும் மீட்கப்பட்டுள்ளன. இதேவேளை, தீயை கட்டுப்படுத்திய நிலையில் அவசர காவல்துறை சேவை 119 அழைப்பை ஏற்படுத்தியபோதும், அவர்கள் உரிய நேரத்திற்கு வரவில்லை என கல்வி நிலையத்தின் நிர்வாகத்தினர் தெரிவித்துள்ளனர்.