“காந்திக்கும் தமிழ் ஈழத்திற்கு என்ன சம்பந்தம்? எதற்கு ஈழத்தில் 20 காந்தி சிலைகளை நிறுவ நினைக்கிறார் யாழ் இந்தியத் தூதுவர்?” எனக் கேட்டால் “உலகுக்கே அகிம்சையைக் கற்றுக் கொடுத்த காந்தி இந்தியா என்ற அகிம்சை தேசத்தின் சின்னம்!” என்கிறார்கள்!

“22 முறை சாகும் வரை உண்ணாவிரதம் அறிவித்து - ஒரு முறை கூட உண்ணாவிரதத்தால் சாகாதவர் உங்கள் இந்தியக் காந்தி!”

“தமிழீழ விடுதலைக்காக - சாகும் வரை உண்ணாவிரதம் அறிவித்து , சாகும் வரை உண்ணா விரதம் இருந்து , கொண்ட கொள்கைக்காக 12 நாட்கள் நீராகாரம் கூட அருந்தாமல் உயிர் நீத்து , உலகத்திற்கு அகிம்சையைக் கற்றுக் கொடுத்தார் நமது அண்ணன் தியாக தீபம், உண்மையான மகாத்மா எங்கள் திலீபன்!

அற வழியில் நியாயமான 5அம்சக் கோரிக்கைகளை முன் வைத்துப் போராடிய திலீபனை அநீதியாகச் சாகடித்த இந்தியா உலகுக்கு அகிம்சையைக் கற்றுக் கொடுக்கும் தேசமா?

அற வழியில் போராடிய அன்னை பூபதி என்ற வயோதிபத் தாய் பசி இருந்து கொள்கைக்காக உயிர் துறக்க பார்த்திருந்த தேசம் அகிம்சையைப் போதிக்கும் தேசமா?

அமைதிப்படை என வந்து ஆக்கிரமிப்புப் படையாக மாறி ஈழத்தில் ஆயிரக்கணக்கான தமிழர்கள் உயிர்குடித்து பல பெண்களை பாலியல் வன்புணர்வு செய்து கொன்ற ரஜீவ் காந்தியின் ஏவல்ப்படை வெறியாடி ஈழத்தை அழித்த பின்னும் இந்தியாவை தமிழர் எம்மிடமே அகிம்சை தேசம் எனச் சொல்ல எப்படி முடிகிறது உங்களால்?

கையாலாகாத சிறிலங்காப் படைக்கு கை கோர்த்துத் துணை நின்று இந்த நூற்றாண்டின் கொடிய இனப்படுகொலையை செய்து இன்றளவும் இலங்கைக்குள் ஆக்கிரமிப்புக் கரங்களை அகல விரித்து காந்தி சிலை வடிவிலும் ஈழத்தை ஆக்கிரமித்து அடக்கி ஆள நினைக்கும் இந்தியா அகிம்சை தேசமா?

தமிழக மீனவர்களை சிறிலங்கா கடற் படை கொல்ல அவர்களுக்கு கப்பல் தளபாடங்கள் பயிற்சிகள் வழங்கி தமிழினப் பகையை சொந்த தேச மக்களிடமே தூத்துக்குடி படுகொலை உள்ளிட்ட பல தமிழ்த் தேசிய சிக்கல்களிலும் கஷ்மீர், மணிப்பூர் உள்ளிட்ட பல் தேசிய மக்கள் மீதான அடக்குமுறைகளிலும் வெளிப்படுத்தும் இந்தியா அகிம்சையைப் போதிக்கும் தேசமா?

எங்கள் மண்ணின் மகாத்மா திலீபன், அன்னை பூபதி என உலகுக்கே உண்மையான அகிம்சையைப் அற வழிப் போராட்டம் மூலம் உயிர் கொடுத்துப் போதித்த எங்கள் வீரர்களுக்கு சிலை வைக்க எம் மண்ணில் இடமில்லையாம்..

எம் காவல் தெய்வங்களான மாவீர்ர்களுக்கு துயிலுமில்லம் வைக்க அநுமதியில்லையாம்..

ஆனால் எம்மை அழித்த இந்தியா சிறிலங்கா அரசுகள் புத்தன் காந்தி சிலைகள் மூலம் எம் நிலத்தை அபகரித்து தமிழர்கள் நிலத்தில் கூத்தாடுவார்களாம்!

அதை நாமும் போற்றி வணங்க வேண்டுமாம்...

என்னே உங்கள் நீதி????