வெல்லுகின்ற நாள் வரும்.!
ஏக்கத்துடன் திரியும்
உங்கள் முகங்களைக்காண
எங்கள் இதயமும்
வலிக்கின்றது.
மூட்டைத்தூக்கி
மூன்று காசு உழைத்து
மரமேறி மாடாய்த் தேய்ந்து
உரமேறிய உங்கள் வியர்வையால்
நிலமேகிப் பயிர் செய்து
தேடிய தேட்டங்களில்
ஓட்டங்கண்டது
உங்களின் வாழ்க்கைப் பயணம்.
இப்போ சீரழிந்து கிடக்கும்
சொந்த வாழ்விடத்தைக் கண்டு
நொந்து போகும் உங்களுக்காய்
வெந்து உருகுகின்றோம்.
முகவரிகள் நிரந்தரமற்று
எத்தனையோ தற்காலிகாங்களோடு
கழிகிறது உங்களின் தாங்ககாங்கள்.
நம்பிக்கையோடு செல்லுங்கள்.
எரிவைத் தாங்காத தங்கம்
பிரகாசமாய் ஒளிர்வதில்லை .
வலிகளை வாழ்வாக்கியது
எங்களின் வரலாறு.
ஓடோடிச் சென்று ஊர் மீட்டு உங்கள்
காலடிக்கு வருவோம்.
வெல்லுகின்ற நாள் வரும்.
உங்கள் உள்ளங்கள்
மகிழ்வு பெறும்.
கவியாக்கம் :புரட்சிநிலா
வெளியீடு :எரிமலை