இரண்டு நாள் யாழ்ப்பாண பயணமாக ஶ்ரீலங்கா பிரதமர் ரணில் விக்கிரமசிங்க யாழ்ப்பாணம் வந்து சேர்ந்தார். கொழும்பிலிருந்து நேற்று மாலை யாழ்ப்பாணத்திற்கு வந்த ஶ்ரீலங்கா பிரதமர் தலைமையிலான அமைச்சர்கள் குழுவினருக்கு பலாலி விமான நிலையத்தில் வரவேற்பளிக்கப்பட்டது. இராஜாங்க அமைச்சர் விஜயகலாவும், தமிழ் அரசுகட்சியின் யாழ் மேயர் இ.ஆர்னோல்ட்டும் வரவேற்றனர். கடந்தமுறை ரணில் விக்கிரமசிங்க யாழ்ப்பாணம் வந்தபோது, அவரின் உதவியாளரை போல பின்னும் முன்னும் திரிந்திருந்தார் யாழ் முதல்வர் ஆர்னோல்ட். இதுவரை எந்த யாழ் முதல்வரும் சபையின் சம்பிரதாய ஆடையுடன் உடன் பொது இடங்களிற்கு சென்று பிரமுகர்களை வரவேற்பதில்லையென்றபோதும், யாழ் முதல்வர் இன்றும் சபையின் சம்பிரதாய ஆடையுடன் உடன் பிரதமரை வரவேற்றார். யாழ் மாவட்டத்தில் புதிதாக தெரிவு செய்யப்பட்ட சமுர்த்தி பயனாளிகளுக்கான கொடுப்பனவை வழங்கும் நிகழ்வு யாழ் மாநகர மைதானத்தில் நடைபெறவுள்ளது. இதில் பிரதம விருந்தினராக கலந்து கொண்டு இக் கொடுப்பனவுகளை பிரதமர் ரணில் விக்கிரமசிங்க வழங்கி வைக்க உள்ளார். அதே போன்று வடக்கு அபிவிருத்தி அமைச்சின் ஏற்பாட்டில் யாழ்ப்பாணம் கொழும்புத்துறை கெலன் தோட்டம் பகுதியில் புதிதாக அமைக்கப்பட்ட வீடுகளையும் உத்தியோகபூர்வமாக உரிமையாளர்களிடம் கையளிக்க உள்ளார். இந்த இரு நிகழ்வுகளிலும் கலந்து கொள்வதற்காக நேற்று யாழ் வந்துள்ள பிரதமர் தலைமையிலான அமைச்சர்கள் உள்ளிட்ட குழுவினர் யாழ் ஜெற்விங் ஹோட்டலில் தங்கியுள்ளனர். பிரதமரின் யாழ் விஐயத்தை முன்னிட்டு யாழ்ப்பாணத்தில் பாதுகாப்புக்கள் பலப்படுத்தப்பட்டுள்ளது. குறிப்பாக ரணில் தங்கியுள்ள இடம் மற்றும் அவர் கலந்து கொள்ளும் நிகழ்வுகள் இடம்பெறுகின்ற இடங்களிலும் அதேபோல அவர் பயணிக்கும் இடங்களிலும் பெருமளவிலான காவல்துறையினரும் இராணுவத்தினரும் குவிக்கப்பட்டு கடும் பாதுகாப்பு போடப்பட்டுள்ளமை குறிப்பிடத்தக்கது.