தென்தமிழீழம்: கல்முனை வடக்கு உப பிரதேச செயலகத்தைத் தரமுயர்த்தக் கோரி நடத்தப்படும் போராட்டத்துக்கு எதிராக கல்முனை காவல்துறை நிலையத்தில் முறைப்பாடு பதிவு செய்யப்பட்டுள்ளதாகத் தெரிவிக்கப்படுகிறது. கல்முனை வடக்கு உப பிரதேச செயலக விவகாரம் குறித்து கல்முனை மாநகர சபை வளாகத்தில் நேற்று (புதன்கிழமை) மாலை கலந்துரையாடலொன்று இடம்பெற்றது. கல்முனை மாநகர சபை முஸ்லிம் உறுப்பினர்கள், பள்ளிவாசல் நிர்வாகத்தினர், வர்த்தக சமூகத்தினர் கலந்துகொண்ட இந்தக் கூட்டத்தின் முடிவில், கல்முனை வடக்கு உப பிரதேச செயலகத்தைத் தரமுயர்த்தக் கோரி நடத்தப்படும் போராட்டத்துக்கு எதிராக பொலிஸில் முறைப்பாடு செய்வது எனத் தீர்மானிக்கப்பட்டது. அதற்கமையவே நேற்று இரவு கல்முனை பொலிஸ் நிலையத்தில் முறைப்பாடு பதிவு செய்யப்பட்டது. கல்முனை வடக்கு உப பிரதேச செயலகத்துக்கு முன்பாக இடம்பெற்றுவரும் சாகும்வரையிலான உண்ணாவிரதப் போராட்டத்தால் பொதுப்போக்குவரத்துக்குப் பாதிப்புகள் ஏற்படுகின்றன எனவும் அவசரகாலச் சட்ட விதிகளுக்கமைய அப்போராட்டத்தை சமூக நல்லிணக்கம் கருதி அகற்ற வேண்டும் எனவும் பொலிஸ் முறைப்பாட்டில் குறிப்பிடப்பட்டுள்ளதாகத் தெரிவிக்கப்படுகிறது. மேலும் இந்த போராட்டத்திற்கு எதிராக கல்முனை வடக்கு உப பிரதேச செயலகத்தைத் தரமுயர்த்த வேண்டாமெனக் கூறி முஸ்லிம் சமூகத்தினர், சாகும்வரையிலான போராட்டமொன்றை இன்று முன்னெடுக்கவுள்ளதாக தெரிவித்துள்ளமை குறிப்பிடத்தக்கது.