வடக்கில் வுவனியாவில் இருந்து காங்கேசன் துறைவரையான வடக்கிற்கான புகையிரத கடவைகளில் இதுவரை பல நூற்றுக்கணக்கான தமிழ் மக்களின் ஊர்திகள் விபத்துக்குள்ளாகியும்,மக்கள் உயிரிழந்த சம்பவங்கள் பல பதிவாகியுள்ளபோதும் பலஊடகங்கள் அது தொடர்பில் செய்தியினை வெளியிட்ட போதும் கண்டு கொள்ளாத சிறீலங்காவின் சட்டத்துறையும் புகையிரத திணைக்களமும் சிங்கள அரசும் நேற்று கிளிநொச்சி 155 ஆம் கட்டைபகுதியில் இடம்பெற்ற புகையிரத விபத்தில் 6 சிங்கள படையினர் உயிரிழந்த சம்பவத்தினை தொடர்ந்து அந்த பகுதி புகையிரத சிக்னர் தொடர்பிலும் விபத்து ஏற்பட காரணம் தொடர்பிலும் உடனடி விசாரணைகளை முடக்கிவிட்டுள்ளன. தமிழர்கள் இறக்கும் போது தமிழர்களின் வாழ்வாதாரமான பல நூற்றுக்கணக்கான கால்நடைகள் இறக்கும் போதும் கண்டுகொள்ளாத சிங்கள ஆட்சியாளர்கள் சிங்கள படையினர் உயிரிழந்தமையே கண்ணுக்கு புலப்படுகின்றமை தமிழர்களை பாராபட்சம் பார்க்கும் செயல் என மக்கள் விசனம் தெரிவித்துள்ளார்கள்.   கிளிநொச்சி புகையிரத விபத்து தொடர்பில் தெரியவருகையில் விபத்து இடம்பெற்ற சந்தர்ப்பத்தில், குறித்த சமிக்ஞை கட்டமைப்பு செயலிழந்திருந்ததாக எழுந்துள்ள குற்றச்சாட்டின் அடிப்படையில் இந்த விசாரணைகள் முன்னெடுக்கப்பட்டுள்ளன. விபத்தின் போது, குறித்த சமிக்ஞை கட்டமைப்பு சேதமடைந்துள்ளது. இது தொடர்பில் கிளிநொச்சி பொலிஸார் விசாரணைகளை முன்னெடுத்து வருகின்றனர். ரயில் கடவையில் பொருத்தப்பட்டிருந்த சமிக்ஞை கட்டமைப்பு செயலிழந்திருந்ததாக பெரும்பாலான பிரதேச மக்கள் தெரிவித்துள்ளதாக பொலிஸார் குறிப்பிட்டுள்ளனர். கிளிநொச்சி – முறிகண்டி ரயில் நிலையங்களுக்கு இடையிலான பகுதியில் அமைந்துள்ள பாதுகாப்பற்ற ரயில் கடவையில் இடம்பெற்ற விபத்தில் 6 இராணுவ சிப்பாய்கள் உயிரிழந்துள்ளனர். இந்த விபத்தில் காயமடைந்த இராணுவ சிப்பாய் ஒருவர் யாழ். போதனா வைத்தியசாலையில் சிகிச்சை பெற்று வருகின்றார்.