ஶ்ரீலங்கா பிரதமர் ரணில் விக்கிரமசிங்கவின் வருகைக்காக பயனாளிகள் ஐந்து மணித்தியாலங்களாக காக்க வைக்கப்பட்டிருந்த நிலையில், பிரதமர் உள்ளிட்ட அதிதிகள் ஐந்து நிமிடங்களில் நிகழ்வை முடித்துக் கொண்டு சென்றதால் நிகழ்வில் கலந்து கொண்டிருந்த பலரும் விசனம் வெளியிட்டுள்ள சம்பவமொன்று வடமராட்சியில் நேற்று இடம்பெற்றுள்ளது. வடமராட்சி கரவெட்டி தெற்கு மேற்கு பிரதேச செயலகத்திற்கு உட்பட்ட உடுப்பிட்டி பகுதியில் அமைக்கப்பட்ட 10 புதிய வீடுகள் கையளிப்பு மற்றும் காணி உறுதிப் பத்திரங்கள் வழங்கும் நிகழ்வு நேற்று (16) காலை 11 மணிக்கு இடம்பெறுமென பொது மக்களுக்கு அறிவிக்கப்பட்டிருந்தது. இதனால் பயனாளிகளை காலை 8.30 மணி முதல் 9 மணிக்கு முன்னதாக வருமாறும் அழைப்பு விடப்பட்டிருந்தது. இதற்கமைய குறித்த நேரத்திற்கே வந்த பொது மக்கள் மற்றும் பயனாளிகள் பாதுகாப்பு சோதனைகளின் பின்னர் நிகழ்வு நடைபெறும் இடத்திற்கு அனுமதிக்கப்பட்டிருந்தனர். அழைத்து வரப்பட்டவர்களும் அந்த நேரத்திற்குள் கொண்டு வரப்பட்டனர். ஆயினும் நிகழ்வு ஆரம்பமாகுமெனக் குறப்பிட்ட 11 மணிக்கு பிரதமர் உள்ளிட்ட அதிதிகள் வருகை தராதமையினால் அங்கிருந்த பலரும் கடும் விசனமடைந்திருந்தனர். சிலர் அங்கிருந்து செல்ல முயன்றபோது, அதிகாரிகளால் தடுத்து நிறுத்தப்பட்டனர். மாலை இரண்டு மணிக்கு பிரதமர் மற்றும் எம்.ஏ.சுமந்திரன் ஆகியோர் நிகழ்வு நடைபெறும் இடத்திற்கு வந்து நிகழ்வை ஆரம்பித்து வைத்திருந்தனர். வீட்டுத் திட்டத்திற்கான அடிக்கல்லை பிரதமர் திரை நீக்கம் செய்து வைத்ததுடன் புதிதாக அமைக்கப்பட்ட வீடுகளையும் நடாவெட்டித் திறந்து வைத்தார். அந்த வீடுகளையும் பார்வையிட்டனர். இதனைத் தொடர்ந்து அந்தக் வீட்டுத் திட்டப் பயனாளிகளுக்கான காணி உறுதிப் பத்திரங்களையும் பிரதமர் வழங்கி வைத்தார். இந் நிகழ்விற்காக காலை 9 மணிமுதல் மாலை 2 மணிவரையாக சுமார் ஐந்து மணிநேரம் பயனாளிகளும் பொது மக்களும் என நூற்றுக்கணக்கானோர் காத்திருந்த நிலையில் குறித்த நிகழ்வை சுமார் ஐந்து நிமிடங்களில் முடித்துவிட்டு பிரதமர் உள்ளிட்ட அதிதிகள் சென்றிருந்தமை குறிப்பிடத்தக்கது. இதனால் நிகழ்வில் கலந்த கொள்ள வந்திருந்த பலரும் கடும் அதிருப்தியை வெளியிட்டிருந்தனர். அதே நேரம் இந்த வீட்டுத்திட்டம் கையளிப்பு மற்றும் காணி உறுதிப்பத்திரங்களை பெறும் பயனாளிகளைத் தவிர சமுர்த்தி உள்ளிட்ட வேறு திட்டங்களில் உள்வாங்கப்பட்ட பயனாளிகளும் நிகழ்விற்கு அழைக்கப்பட்டிருந்தமை குறிப்பிடத்தக்கது. அதற்கான உதவிகளும் வழங்கப்படும் என அவர்களிற்கு தெரிவிக்கப்பட்டிருந்தது. எனினும், அந்த உதவிகள் எதுவும் வழங்கப்படவில்லை. இவ்வாறு அழைக்கப்பட்ட பயனாளிகள் பொது மக்கள் என அனைவரும் ஐந்து மணி நேரம் காத்திருக்க வேண்டிய நிலைமை ஏற்பட்டது. நிகழ்வு முடிவடைந்த பின்னர் கடும் அதிருப்தியை வெளியிட்டு விசனத்துடன் திரும்பிச் சென்றிருந்தமையும் குறிப்பிடத்தக்கது