வடதமிழீழம்; முல்லைத்தீவு- செம்மலை நீராவியடிப் பிள்ளையார் ஆலய வளாகத்தில் நீதிமன்ற உத்தரவை மீறி பௌத்த மதகுருவின் பூதவுடைலை தகனம் செய்தமைக்கு எதிர்ப்பு தெரிவித்து வடக்கு மாகாண சட்டத்தரணிகள் இரண்டாவது நாளாகவும் பணிப்புறக்கணிப்பில் ஈடுபட்டு வருகின்றனர். சட்டத்தரணிகளின் பணிப்புறக்கணிப்பு காரணமாக நீதிமன்ற சேவைகள் முடக்கப்பட்டுள்ளதாகவும் இதனால் மக்கள் பாதிக்கப்பட்டுள்ளதாகவும் எமது பிராந்திய செய்தியாளர்கள் தெரிவித்தனர். அதற்கமைய யாழ்ப்பாணம், மன்னார், வவுனியா, முல்லைத்தீவு என அனைத்து மாவட்டங்களின் நீதிமன்ற சேவைகளும் முடங்கியுள்ளன. அந்தவகையில் முல்லைத்தீவு மாவட்ட சட்டத்தரணிகள் இன்று (புதன்கிழமை) 2ஆவது நாளாகவும் பணிப்புறக்கணிப்பில் ஈடுபட்டு வருகின்றனர். இதன் காரணமாக நீதிமன்ற சேவைகள் ஸ்தம்பிதமடைந்துள்ளதாக எமது பிராந்திய செய்தியாளர் தெரிவித்தார். நீதிமன்ற வளாகத்துக்கு முன்பாக ஒன்றுகூடிய சட்டத்தரணிகள் வாயில் கருப்பு பட்டி கட்டியவாறு பதாதைகளை ஏந்தியவண்ணம் போராட்டத்தில் ஈடுபட்டுள்ளனர்.   அதேபோல மன்னார் நீதவான் நீதிமன்ற சட்டத்தரணிகளும் இன்று அடையாள பணிப்புறக்கணிப்பில் ஈடுபட்டு வருகின்றனர். மன்னார் நீதிமன்றத்திற்கு வருகை தந்த சட்டத்தரணிகள் காலை 10.30 மணியளவில் நீதிமன்றத்திற்கு வெளியில் வந்து தமது வாயை கருப்பு பட்டியினால் கட்டி பணிப்புறக்கணிப்பில் ஈடுபட்டனர். இதனையடுத்து இன்றைய தினம் மன்னார் நீதிமன்றத்திற்கு வழக்கு விசாரனைகளுக்காக வந்த மக்கள் திரும்பிச் சென்றதோடு, இன்றைய தினம் இடம்பெறவிருந்த வழக்கு விசாரனைகள் பிரிதொரு தினத்திற்கு திகதியிடப்பட்டுள்ளன. இதேவேளை யாழ்ப்பாணத்திலும் சட்டத்தரணிகள் தொடர்ச்சியாக பணிப்புறக்கணிப்பில் ஈடுபட்டு வருகின்றனர். இதன் காரணமாக இன்று விசாரணைகள் இடம்பெறவிருந்த வழக்குகள் பிரிதொரு தினத்திற்கு தவணையிடப்பட்டுள்ளன. அவ்வாறே வவுனியா மாவட்ட சட்டத்தரணிகளும் இன்று பணிப்புறக்கணிப்பில் ஈடுபட்டுள்ளனர். வவுனியா நீதிமன்ற வாளகத்திற்கு முன்பாக ஒன்றுகூடிய சட்டத்தரணிகள் வாயில் கருப்பு பட்டியை கட்டி போராட்டத்தில் ஈடுபட்டு வருகின்றனர். இதனையடுத்து இன்றைய தினம் வவுனியா நீதிமன்றத்திற்கு வழக்கு விசாரனைகளுக்காக வந்த மக்கள் திரும்பிச் சென்றதாக எமது பிராந்திய செய்தியாளர் தெரிவித்தார். அதேபோல கிளிநொச்சி மாவட்டத்திலும் சட்டத்தரணிகள் இன்று பணிப்புறக்கணிப்பில் ஈடுபட்டனர். எனினும் அவர்கள் 1 மணித்தியாலம் மாத்திரம் பணிப்புறக்கணிப்பில் ஈடுபட்டதாகவும் தற்போது வழமைபோன்று வழக்கு விசாரணைகள் இடம்பெற்று வருவதாகவும் எமது பிராந்திய செய்தியாளர் தெரிவித்தார். செம்மலை நீராவியடிப் பிள்ளையார் ஆலய வளாகத்தில் பௌத்த மதகுருவின் பூதவுடைலை தகனம் செய்வதற்கு நீதிமன்றம் தடை விதித்திருந்தது. குறித்த தடை உத்தரவை மீறி ஆலய வளாகத்தில் கொலம்பே மேதாலங்காதர தேரரின் உடல் கடந்த திங்கட்கிழமை தகனம் செய்யப்பட்டது. இதன்போது இதற்கு எதிர்ப்பு தெரிவித்த பொதுமக்கள் மீதும் சட்டத்தரணிகள் மீதும் தாக்குதல் மேற்கொள்ளப்பட்டது . குறித்த சம்பவங்களை கண்டித்து வடக்கு மற்றும் கிழக்கு மாகாண சட்டத்தரணிகள் நேற்று  அடையாள பணிப்புறக்கணிப்பை மேற்கொண்டிருந்தனர். மேலும் குறித்த பணிப்புறக்கணிப்பு எதிர்வரும் வெள்ளிக்கிழமை வரை தொடரும் என சட்டத்தரணிகள் அறிவித்துள்ளனர். நீதிமன்றத்தின் கட்டளையை உதாசீனம் செய்த ஞானசார தேரர் உட்பட சட்டத்தரணிகள் மற்றும் பொதுமக்கள் மீது தாக்குதல் மேற்கொண்டவர்களையும் கட்டளையை அமுல்படுத்த தவறிய பொலிஸ் அதிகாரிகள் மீதும் சட்ட நடவடிக்கையினை மேற்கொள்ள வேண்டும் என வலியுறுத்தியே இந்த பணிப்புறக்கணிப்பு மேற்கொள்ளப்படுகிறது. இதேவேளை கிழக்கு மாகாணத்திலுள்ள நீதிமன்றங்களின் செயற்பாடுகள் வழமைபோன்று இயங்குகின்றைமை குறிப்பிடத்தக்கது.