ஒடிசா மாநிலத்தில் உள்ள ஒருங்கிணைந்த ஏவுகணை சோதனை தளத்தில் சிங்கப்பூரின் ஸ்பைடர் ரக ஏவுகணைகளை பரிசோதனை செய்வது குறித்த ஒப்பந்தம் கையெழுத்தாகியுள்ளது. குறித்த ஒப்பந்தம் நேற்று (புதன்கிழமை) கையெழுத்தாகியுள்ளது. அரசுமுறை பயணமாக சிங்கப்பூர் சென்றுள்ள பாதுகாப்பு துறை அமைச்சர் ராஜ் நாத் சிங்கிற்கும், சிங்கப்பூரின் பாதுகாப்புத் துறை அமைச்சர் நஜி யங் ஹேங்கிற்கும் இடையில் இடம்பெற்ற பேச்சிவார்த்தையின் பின்பே குறித்த ஒப்பந்தம் கையெழுத்தாகியுள்ளது. இது குறித்து கருத்து தெரிவித்துள்ள சிங்கப்பூர் பாதுகாப்பு துறை அமைச்சர், “பரப்பளவில் சிறிய நாடாக இருப்பதால், ஸ்பைடர்’ ரக ஏவுகணைகளை சிங்கப்பூரில் பரிசோதித்துப் பார்ப்பது இயலாத ஒன்றாக உள்ளது. எனவே, அதுபோன்ற ஏவுகணைகளை தங்களது இடத்தில் பரிசோதித்துப் பார்ப்பதற்காக இந்தியா அனுமதி அளித்ததற்காக நன்றி தெரிவிக்கிறோம். பெரும் நிலப் பகுதியை கொண்ட நாடாக இருந்தாலும், இத்தகைய அனுமதியை இந்தியா வழங்கியது எந்த அளவு முக்கியத்துவம் வாய்ந்தது என்பதை அறிந்துள்ளோம். இந்தியா அளித்துள்ள இந்த வசதியை ஆக்கப்பூர்வமாக பயன்படுத்துவோம்” எனத் தெரிவித்துள்ளார். இதேவேளை இந்த சந்திப்பில் அமைச்சர் ராஜ்நாத் சிங் இந்தியாவில் முதலீடுகளை மேற்கொள்ளுமாறு அழைப்பு விடுத்துள்ளதாகவும் இந்திய ஊடகங்கள் செய்தி வெளியிட்டுள்ளன. மேலும் ஸ்பைடர்’ ரக ஏவுகணையானது, போர் விமானம் உள்ளிட்டவற்றை நிலத்திலிருந்து தாக்கக் கூடிய வல்லமை படைத்ததாகும்.