07.04.2026

​

சின்னத்துரை சற்குணநாதன் அவர்களிற்கு

"நாட்டுப்பற்றாளர்" மதிப்பளிப்பு

தமிழீழப்பற்றோடும் தாய்மொழிப்பற்றோடும் தனது இறுதிமூச்சுவரை தமிழீழ விடுதலைக்காகப் பணியாற்றிய சின்னத்துரை சற்குணநாதன் அவர்கள், 12.03.2026 அன்று உடல்நலக்குறைவினால் சாவடைந்தார் என்ற செய்தி எமக்குப் பெருந்துயரினை ஏற்படுத்தியுள்ளது.

இவர், 1976 ஆம் ஆண்டு புலம்பெயர்ந்து யேர்மனி நாட்டில் வாழ்ந்துவந்தவராவார். தமிழீழத் தேசியத்தலைவர் மீதும் தமிழீழ விடுதலைப்போராட்டத்தின் மீதும் ஆழமான பற்றுறுதியும் அசைக்க முடியாத நம்பிக்கையும் தெளிவான சிந்தனையும் கொண்டிருந்த இவர், 1979 ஆம் ஆண்டிலிருந்து அனைத்துலகக் கட்டமைப்பு வலுப்பெறும்வரை தேசியத்தலைமையுடனான தொடர்பினைப்பேணி, தனக்களித்த பணியினைச் சிறப்பாகச் செய்தவராவார்.    

தமிழீழ விடுதலைப்போராட்டத்தின் ஆரம்பகாலத்தில் தொழில்நுட்ப ஊடகங்கள் பயன்பாட்டில் இல்லாத போது, தமிழீழ விடுதலைப்போராட்டம் சார்ந்த ஆவணங்கள் இவரிற்கு அனுப்பப்பட்டு, அவற்றைத் தேசியத்தலைவரின் அனுமதியுடன் யேர்மன்மொழியிலும் ஆங்கிலமொழியிலும் மொழிபெயர்ப்புச் செய்து புலம்பெயர்நாட்டுத் துறைசார்ந்தோருக்கும் தமிழ்ப்பிரதிநிதிகளிற்கும் வழங்கியவராவார்.

இவர், தனது வாழ்விடநாட்டின் பல நகரங்களில் தன்னாலான விடுதலைப்போராட்டப் பணிகளில் ஈடுபட்டதுடன் தமிழ்மக்களையும் அப்பணிகளில் செயலாற்றச்செய்தவராவார். அத்துடன், இவர் தனது யேர்மன் மற்றும் ஆங்கிலமொழித் திறமையால், தமிழ் மக்கள் மீதான இனவாத சிங்கள அரச இராணுவத்தின்  இனவழிப்பை வாழ்விடப் பிரதிநிதிகளிற்கு அனுப்பிவைத்தவராவார்.

இவர், யேர்மனி நாட்டில் "ஐரோப்பியக் கணினி கல்விநிலையம்" எனும் அறிவியற்தளத்தினை நிறுவி, "கணினி ஓர் அறிமுகம்" எனும் நூலினைத் தமிழ்மொழியில் வெளியிட்டு, தமிழ் மாணவர்களிற்கு பயனுள்ள பணியினைச் செய்தவராவார்.

இவர், தாயகத்தில் போரினாலும் இயற்கை அனர்த்தங்களினாலும் பாதிக்கப்பட்ட மக்களிற்கான உதவிகளை அவர்களின் தேவையறிந்து, உடனுக்குடன் செய்ததோடு, விழுப்புண்ணடைந்த போராளிகளிற்குத் தன்னாலான பல உதவித்திட்டங்களை முன்னெடுத்து, அவர்களது உடல், உள  ஆரோக்கியத்தினையும் வாழ்வாதாரத்தினையும் மேம்படுத்த உதவியவராவார்.    

தமிழீழத் தேசியத்தலைவர் மேதகு வே.பிரபாகரன் அவர்கள் மீதும் தமிழீழ விடுதலைப்போராட்டத்தின் மீதும் ஆழமான பற்றுதல்கொண்டு, போராட்டத்தின் ஆரம்பகாலம் தொடக்கம் தனது இறுதிமூச்சு வரை, தன்னை அர்ப்பணித்துத் தேசவிடுதலைக்காக மிகப்பெரும் பலம் சேர்த்த இவரது  இழப்பில் துயருற்றிருக்கும் குடும்பத்தினர், உறவினர், நண்பர்களின் துயரில் நாமும் பங்கெடுத்துக்கொள்வதுடன், சின்னத்துரை சற்குணநாதன் அவர்களின் விடுதலைப்பற்றிற்காகவும் தேசவிடுதலைக்கு அவர் ஆற்றிய பணிகளிற்காகவும் "நாட்டுப்பற்றாளர்" என மதிப்பளிப்பதில் நாம் பெருமையடைகின்றோம்.

                                                    "புலிகளின் தாகம் தமிழீழத் தாயகம்"

அனைத்துலகத் தொடர்பகம்,

தமிழீழ விடுதலைப் புலிகள்.